Hwyl haf yn chwarae plant

Mae sesiynau chwarae sy’n cael eu cynnal gan gymdeithas dai wedi bod mor boblogaidd gyda phlant fel eu bod nhw’n cael eu hymestyn y tu hwnt i’r haf.

Bydd y rhaglen a drefnir gan Cartrefi Conwy yn awr yn parhau ar ôl ysgol yn ystod y tymor unwaith y bydd gwyliau’r haf yn dod i ben.

Mae hefyd wedi darparu gwaith i ddau berson ifanc, y mae eu swyddi’n cael eu hariannu trwy gynllun Kickstart y llywodraeth.

Dywedodd Megan Eldon, Cydlynydd Ymgysylltu Cymunedol Cartrefi Conwy, fod wyth o sesiynau gweithgareddau hwyl 90 munud yr wythnos yn cael eu cynnal ledled Conwy.

Dywedodd eu bod yn ddiolchgar am gefnogaeth Tîm Datblygu Chwarae Cyngor Bwrdeistref Conwy.

Ymhlith y safleoedd lle cynhelir y sesiynau chwarae wythnosol y mae parc cymunedol Rhodfa Caer ym Mae Cinmel lle dywedodd Megan: “Mae tua 10 i 15 o blant oed ysgol gynradd yn dod draw yn rheolaidd yma bob wythnos.

“Maen nhw fel arfer eisoes yn y parc yn aros amdanon ni pan rydyn ni’n cyrraedd yn ein fan ac maen nhw’n helpu’n eiddgar i osod yr offer.

“Mae mor galonogol i ni weld ymateb mor gadarnhaol a gwybod bod ein hymdrechion yn cael eu gwerthfawrogi.”

Un o’r rhai a ymwelodd â sesiynau chwarae Rhodfa Caer oedd Lexi Williams, naw oed, sy’n ddisgybl yn Ysgol Maes Owen, a ddywedodd: “Mae wedi bod yn gymaint o hwyl.

“Mae yna lawer i’w wneud, o rasys sachau a rasys wy a llwy i gyrsiau crefftau a chwrs rhwystrau. Rydw i wrth fy modd yma.”

Dywedodd y ffrindiau a chymdogion Leland Woodbridge a Kyla Green, y ddau yn saith oed, eu bod nhw hefyd wedi cael amser gwych.

Meddai Leland: “Mae’n grêt cael rhywbeth fel hyn i’w wneud efo ffrindiau. Rydyn ni wedi gwneud lliwio, a rhedeg, ac adeiladu efo briciau smalio.”

Ychwanegodd Megan: “Mae’r ymateb a gawsom gan blant ac oedolion i sesiynau chwarae gwyliau haf eleni wedi bod mor gadarnhaol fel ein bod wedi sylweddoli ei fod yn ddarpariaeth werthfawr ar unrhyw adeg o’r flwyddyn ac mae penderfyniad wedi’i wneud i barhau â gweithgareddau y tu hwnt i adeg y gwyliau. Byddwn yn parhau i gynnig rhaglen wythnosol ar ôl ysgol yn ystod y tymor.”

Croesawyd y newyddion gan Emma Abdelkhalek, Swyddog Datblygu Tŷ Cymunedol Rhodfa Caer.

Dywedodd Emma, ​​sy’n helpu gyda’r sesiynau ym Mae Cinmel: “Mae sesiynau fel hyn yn gwneud gwahaniaeth mor gadarnhaol i les plant. Mae’n gyfle go iawn ar gyfer chwarae creadigol a chymdeithasu mewn ffordd hamddenol, hwyliog y mae pawb o’r plant yn ei mwynhau.

“Rwy’n byw yma ar yr ystâd ym Mae Cinmel ac rwy’n gwybod yn uniongyrchol gymaint o fwynhad y mae’r plant yn ei gael. Mae llawer ohonyn nhw’n fy adnabod neu wedi fy ngweld yn helpu allan ac os ydyn nhw’n fy ngweld yn y stryd neu yn y siopau, maen nhw bob amser yn gofyn pryd mae’r sesiynau chwarae nesaf yn digwydd a faint o’r gloch mae angen iddyn nhw fod yno.”

Hefyd yn rhoi help llaw y mae Ellie Evans o Dîm Datblygu Chwarae Conwy, a dau gydweithiwr ifanc Catrin Owen a John Gill.

Recriwtiodd Cartrefi Conwy Catrin a John trwy gynllun Kickstart y llywodraeth sy’n helpu pobl ifanc i ddod o hyd i gyfleoedd cyflogaeth.

Mae’r ddau wedi cael eu cyflogi am chwe mis i ddechrau ac yn ennill profiad gwerthfawr a allai helpu i lunio eu gyrfaoedd yn y dyfodol.

Dywedodd Catrin, 19 oed, mai’r swydd hon oedd ei swydd gyntaf ers gadael Ysgol y Creuddyn, Bae Penrhyn.

Meddai: “Roeddwn mor falch o gael y cyfle hwn. Rydw i bob amser wedi bod eisiau gweithio gyda phlant a diolch i’r cyfle Kickstart hwn, byddaf rŵan yn gallu cynnwys y gwaith hwn ar fy CV i’m helpu tuag at fy nod yn y pen draw o weithio efallai fel cynorthwyydd dysgu neu fath arall o waith ieuenctid.

“Mae’n gyfle mor anhygoel i mi. Rydw i wrth fy modd ac mae Cartrefi Conwy yn gwmni gwych i weithio iddo, maen nhw wir yn buddsoddi mewn hyfforddi staff, rydw i’n dysgu cymaint diolch iddyn nhw.”